عفريت ام عااااااااااااااااادل

| | 2 comments
شقتنا اللي في مصر طبعاً شقة في عمارة

وعمارتنا جنبها عمارة

والعمارة اللي جنبنا كان فيها ست اسمها ام عادل

كانت ست قوية ومفترية يلا الله يرحمها بقى

اتقتلت هي وجوزها في الشقة .. الجيران صحيوا الصبح شافوا دم نازمل ع السلم

طالع من شقتهم جابوا البوليس

لقيوا حد مدقدق دماغهم بشاكوش وظبطهم بسكينة

ايه دوري انا في الحوار دا ؟؟

دوري في الحوار طبعاً اني جارتهم

وحظي الاغبر ان اوضتي قصاد شقتهم

وحظي الأغبر منه ان اخويا عارف اني بترعب

وقعد بقى يثري خيالى بكل الحاجا اللذيذة الحلوة اللي ممكن عفريت ام عادل يطلع يعملها فيا

مع مؤثرات صوتية ببؤه بالليل

الكلام دا كان وانا صغيرة فكنت ما برضاش انام في الاوضة الا لما خلاص ابقى بقع كده وعايزة انام

المهم بقى شقة ام عادل فاضية ليييييييييييييه ؟؟

علشان ولادها مسافرين برا

والباقيين منهم ماتوا .. اللي انتحر واللي مات كده

فشقة ام عادل مقفولة

ومهجورة

وانا بدأت اتقبل الأمر الواقع


جيت في يوم صاحية من النوم كده وكلي تفاؤل ومش عارف ايه

وادخل البلكونة الاقي في سجادة منشورة في البلكونة

والسجادة فيها بقعة كبيييييييييييييييييييييييييييييييييييييييييييييييرة غامقة

فشوية كده تنحت وازبهليت عقبال ما استوعبت ان في سجادة منشورة في شقة ام عادل المقفولة

وشوية اكتر عقبال ما استوعبت ان البقعة الكبييييييييييييييييييييييييييييييييرة دي بقعة الدم

بتاعة يوم الحادثة

ولس ما فوقتش لقيت السجادة بتتحرك وفي واحدة بتشيلها

روحت راقعة بالصوت

عااااااااااااااااااااااااااااااااااا مااااااااااااااااااااااااااااااااماااااااااااااااااااااااا الحقيني عفريت ام عادل طلع

ودخلت اجري زي الملسوعة في الشقة

ماما طبعاً طلعت تجري ع البلكونة وهي متأكدة انها هتلاقي حاجة عبيطة

وطلعت فعلاً

" اهلاااااااااااااااااااا ازيك يا نادية عاملة ايه نورتي مصر

وانتي هنا من امتي بقى ؟؟

ياااااااااه انتى اول مرة تيجي من ساعة الحادثة ؟ "

حببببببببك الست تيجي اليومين اللي احنا قاعدين فيهم في الشقة ما تيجي تشوف مسرح الجريمة طول السنة قدامها

طبعاً مش عايزة اقولكم طول الاسبوع اللى كنا قاعدين فيه وهم هناك اخدت كام نظرة ازدراء وبتاع كل ما اطلع البلكونة وتكون هي في البلكونة علشان الرقعة الحياني اللي رقعتها في وشها