سارة هوم ألون.. بجد!!

| | 0 comments

فاكرين لما كنت بتخيل هعيش إزاي هوم الون؟  أنا كنت متخيلة إن الحكاية هتفضل خيال في خيال وعمرها ما هتقلب بجد :D  المشكلة إنها قلبت بجد.. وأنا فعلاً عشت لوحدي عدد لا بأس به من الليالي والأسابيع.. لأ وفين؟ فاكرين عفريت أم عادل؟؟ في الشقة اللي قصادها :D 
ودا يعني سلسلة لا نهائية من الرعب في بيتنا التاني.. شكل المشكلة فيا :D 
هحكي أكيد.. بس مش دلوقتي.. أنا جعانة، وعايزة أنام وسامعة خطاوي بتدبدب فوق السطح!

القطط عارفين حاجات احنا مش عارفينها !!!!

| | 0 comments
 "بصيت للقطة في عينها
القطط عارفين حاجات
احنا مش عارفينها"

وليد طاهر/ حبة هوا

__________________________

اختفاء كاميلا/ اختفاء سيمبا/ اختفاء القط المتوحد/ الحلم !




وانا طفلة كنت بعشق ضلمة سطوحنا.. بخاف من ضلمة الشقة.. لكن ضلمة سطوحنا لأ
يمكن لأن القطط كانت دايمًا تطلع معايا :)
في عز الضلمة.. في مكان معين على السلم، وأنا بقى خلاص بحاول أقنعهم إني لازم ادخل الشقة
وهم مش هينفع يدخلوا.. 
كل القطط كانت تبص لفوق على السلم.. ورا ضهري، وتقعد تنونو وتنفعل زي بالظبط ما بتعمل لما قطة من برة تيجي تضربها!
أحاول اكلمها، ألاعبها، مافيش فايدة.. مركزة جدًا ومبرقة عنيها، وملامحها بتقول إنها خايفة
اختلفت القطط على مدار السنين، وبردو مافيش فايدة.. كل القطط بتترعب من الجزء دا من السلم
الغريب بقى .. إنه لما كاميلا اختفت ( كاميلا كانت قطة ملائكية الهيئة :) بيضا وهادية وبتحب مسلسل كاميلا اللي كان بيتعرض وقتها وكانت متابعاه :) .. أكتر قططي أنوثة ورقة ) جات لي في الحلم.. وهي زعلانة.. وقاعدة في المكان دا من السلم، ووصتني على ولادها !
قبل كاميلا.. بيشو ليلة ما اتقتل، جالي في الحلم بيبص لي وساكت وزعلان.. في نفس المكان!
أولاد كاميلا كلهم بعد فترة اختفوا !!
حتى القط المتوحد الأسود (خال اولاد كميلة من جيل تاني ) اللي اتبنى أولاد كاميلا لما اختفت... حتى هو اختفى ! 
نسمة (أكتر قطة عاشت معايا ) لما اختفت جاتلي في الحلم في نفس المكان، زعلانة وبتبص لي نفس النظرة!
دلوقتي أنتكة.. عنده حالة عصبية تقريبًا.. كل ما نكون قاعدين نلاقيه فجأة اتخض.. وقعد يركز في الضلمة وينونو.. لدرجة إنه بقى يرعبنا..
وبدأت أحس إنه هفأ مش لأني ما عرفتش أربيه.. لكن لأنه بيشوف حاجات مرعبة في الضلمة :( لوحده
أنتكة في مرة جاتله الحالة، فتحت الباب أبص عليه.. على غير عادته أول ما الباب يتفتح.. ما حسش بيا أصلاً !
مركز في نقطة ما في سقف السلم.. في نفس المكان.. بنفس زاوية الرؤية بتاعة كل القطط.. 
ومبرق جدًا بعينه.. وبيحرك بقه كأنه بيبرطم.. وكان بيبرطم فعلاً بالقططي :D 
منظره رعبني لدرجة إني ندهت لأختي وماما، كل دا والباب مفتوح وهو ما جريش يدخل كالعادة..
ولما حاولنا نروح نبص على مكان ما هو بيبص، ما لقيناش حاجة بس هو بدأ صوته يعلى، وقعد يطلع قدامنا كأنه بيحوش عننا :(
مارضيش يدخل جوا الشقة إلا لما رجعنا لورا.. طلع تاني بعد ما دخل يبص في نفس المكان ويبرطم بالقططي
وما هديش إلا لما قفلنا الباب..
ولسة لحد دلوقتي.. أنتكة أول ما يطلع من الشقة، ويلاقي نفسه لوحده في مواجهة السلم.. يطلع يجري :(
الأول كنت بحسبه بيتقمص.. بس اكتشفت دلوقتي إنه بيكون خايف ! 


ملحوظة: لما عمل كده قرأت قرآن بصوت عالي ما حصلش حاجة !! لا صوته علي ولا قل، ولا خوفه زاد ولا قل
ملحوظة تانية: هذا البوست قد يكون فاكس :D 
كوكتيل من حاجات حصلت، وحاجات أنا اتخيلتها :) 
أو نقول.. حاجات حصلت.. وكانت الصورة مش كاملة.. فانا اتخيلت باقي الحكاية :)

في بيتنا .. مش هتقدر تغمض عنيك :D

| | 3 comments
امبارح كنا - أنا وأختي - مطبقين يومين ورا بعض ، نمنا تخاطيف كده قبل الفطار بس بردو كنا مهدودين فجينا  اتسحرنا وصلينا الفجر وقولت بقى للسرير انا وانت وبس يا حلاوتنا هناااااااام  .. طفينا نور الأوضة واستقرينا على سرايرنا والدنيا ضلمة وهادية وسااااااكتة
وفجأة .....
" سارة انتي سامعة حد بيمشي في الشقة اللي فوقينا ؟ " دي أختي

" لأ ما سمعتش حاجة "

عدت دقيقة وأخدت وضعي على السرير وخلاص هناااااام لولا إني المرة دي بقى سمعت :|

حد بيمشي بثبات في الشقة فوق ، اللي هي فاضية ! 

ومفتاح الشقة في الباب من برة ! يعني ممكن في خمس دقايق يخلص علينا  ولا من شاف ولا من دري !

بعديييييييين ؟

"  لازم نشيل المفتاح من باب الشقة يا منى " 

" نعم يا اختي ؟ ومين بقى اللي هيشيله ؟ افرضي فتحنا الباب ولقيناه في وشنا ... لأ بصي تعالي ننام وخلاص "

حاولت انام ما اقدرتش الصوت لسة بيمشي ، قولت في بالي طالما بيمشي فوق اوضتنا دلوقتي ممكن اجري جري والحق ادخل المفتاح قبل ما يوصل هو للسلم .. بس بردو احتياطي لازم اخد حاجة ادافع بيها عن نفسي .. مالقيتش غير بتاعة كده مش عارفة اسمها ايه ، اللي بتنقض التراب عن الحاجات دي ، عصاية وفي أخرها ريش .. قولت هي خيخة آه .. بس ممكن ادبها في عينه ولا في بطنه الهيه شوية 
اخدت البتاعة اللي ما اعرفش اسمها ايه دي ، وطلعت اجري على باب الشقة في حين ان الصوت سكت أول ما ولعت نور الأوضة !

وصلت للباب بقى وجاءت اللحظة الحااااسمة .. لحظة إني أفتح باب الشقة اخطف المفتاح واقفل تاني ، في الثواني دي اتخيلت ألف مليون خاطر اسود .. مرة اني أول ما افتح الباب الاقيه في وشي ، ومرة إني افتح واخد المفتاح واجي أقفل الاقيه حشر رجله في الباب وزقني وزق الباب ، ومرة تالتة تخيلت إنه هيحدفني بحاجة وهو على السلم كل الأفكار دي جات في بالي وانا ماسكة أكرة الباب وبترررررعش ، وفي لحظة شجاعة فتحت الباب وهوب خطفت المفتاح وحطيته من جوة وبقفل الباب ما قفلش !!!!

يهديك يرضيك يابني اقفل ! مش راضي ! سندت بضهري ع الباب بقى وقلت بس هو حشر حاجة في الباب وانا مش شايفة وعشت بقى دور فدائي فدائي واني هموت علشان اللي في البيت يعيشوا والأفلام الهابطة دي ! بعدين عرفت من ماما انه من قلة ما بنقفل الباب بالمفتاح المفتاح تِقل وبقى يعلق .

دخلت بقى اوضتي بعد ما لفيت انا واختي على كل منافذ الشقة نتمم عليها ونقفله ، وقعدنا بقى حابسين نفسنا وبنسمع . 

وسمعنا الصوت تاني وتالت ورابع .. حد بيجرجر حاجة ، وحد بيمشي ، وحاجات بتقع ، وهييييييييصة 

منونة قالت لي لو خايفة يا سارة تعالي نامي جنبي ، قولتلها مين دي اللي تخااف ؟ يابنتي لو انتي اللي خايفة ممكن آجي جنبك هع 

فجأة لقيت نفسي بسقععععع ، اتغطيت ببطانية في أغسطس ! وبردو لسة سقعانة 

الصوت اتكرر تاني ، اختي لقيتني قدام سريرها وبقولها هتتاخري لجوة ولا لبرة :D 

اثناء تلك اللحظات السودا بقى النوم طار من عيني لحد الساعة تمانية الصبح :(( وقعدت أنا واختي بقى نسترجع ذكريات الرعب في بيتنا المصون !

وقعدنا نفتكر .. الأصوات اللي بنسمعها دي ، مرة صوت حد بيعصر حاجة في الخلاط كل يوم الساعة اربعة الفجر بالظبط ! 

وشوية وصوت أطفال بتجري وبتدب وبتلعب ! وشوية وأصوات ناس بتمشي ، وحاجات تترزع وحاجات تتكسر ! صوت حياة أصلاً

قعدنا نفكر بقى يا ترى إيه قصة الأشباح اللي ساكنين عندنا دول قبل ما يكونوا أشباح ؟ وجم ازاي واحنا بيتنا قبل ما يبقى بيتنا كان أرض ماحدش سكن عليها قبلينا ؟؟ 

وإذ فجأةً نزل عليا الوحي كده وجاتلي فكرة !! دولاب جدو القديم ! الدولاب دا كان في بيت جدي زمان ومحطوط دلوقتي في الشقة فوق ، تحديداً فوق اوضتنا 

وماما كتير أوي كانت بتشوف حاجات غريبة في بيتهم ! يبقى أكيييييييييد الأشباح دي جاية في الدولاب !

جميييييييل جداً ! دلوقتي بقى المطلوب اما اننا نتخلص من الأشباح اللي في الدولاب  - ما اعرفش ازاي - واما نتخلص من الدولاب شخصياً - ودا مستحيل متهيألي إنه أسهل إني أقنع ماما تتخلص مني أنا :D 

إذن .. أنا مضطرة أنام وانا عارفة إنه احتمال يكون فوقي دولاب اسود كبيييييير مليان أشباح :D

 أعتقد اني الفترة الجاية مش هنام إلا لما يغمن عليا :S

سارورة هوم ألون الأخيرة

| | 8 comments


زى ما انتوا عارفين

الجوع كافر .. والشيطان شاطر .. والنوم سلطان

الـ 3 بشوات اجتمعوا عليا

كنت همووووووت من الجوع ولازم اكل

والشيطان لعب فى دماغى وقالى اعملى اكل

والنوم حلف ما يسيبنى

انا شفت اول البرنامج بعد معاااناة عقبال ما جابوا مكرونة

عملت الصلصة وسلقت المكرونة

وهووووووووووووب

صحيت من النوم لقيت المكرونة فى الطبق


يالهوى

خيااااااااااااااااااااانة

ازاى تسمح لنفسها تعمل كده فيا

وبكل بلاهة بتبتسم وتقول سفرة هنية

يالهووووووى هعمل ايه دلوقتى بس ياربى ؟؟

زى ما انتوا عارفين دايما شعارى

مافيش فايدة فيا مافيش مستحيل

هع

انا هستنتج باقى الوصفة

ايه يعنى صعبة فى ايه ؟!!

هى اخترعت الذرة مثلاً دى مكرونة

وروحت جرى على المطبخ

عملت الصلصة زى ما الست قالت فى التليفزيون

وسلقت المكرونة

ودلوقتى بقى كانت اللحظة الحاسمة


احم ..

احم ..

هعمل ايه بعد كده ؟؟؟؟؟!!

بعدين عملت فلاش باك

ورجعت بالذاكرة للمكرونة بتاعة ست الكل امى

افتكرت ان المكرونة بيبقى لونها احمر

يعنى الصلصة محطوطة ع المكرونة

عملت فيها ارشميدس وقلت

وجدتهاااااااااا وجدتهاااااااا

وطبعاً لأنى شطورة

وحلوة

ومافيش مني اتنين

قولت اكيييييييييييد مش هفرط فى الماية اللى اتسلقت فيها المكرونة

ايوة ماما دايما تقولى الشوربة فيها كل الفايدة

والشوربة دى تبقى ايه غير الماية اللى اتسلقت فيها االلحمة

طيب والمكرونة تفرق ايه عن اللحمة ؟؟!!

ولا حاجة ..


روحت صبيت المكرونة بمايتها على الصلصة

وبعدين حسيت ان فى فروق طفيفة

يعنى انا فاكرة لما عملت فلاش باك وافتكرت مكرونة ماما

انها كانت مش عايمة فى شوربة

قولت اكيد بيسيبوها لما تشرب الماية


واستنيييييييييت


سااااعة


اتنييييييييييييين

وبعدين اخيرا اخيرا الماية قلت شوية

قولت بس اكيد ماما كانت بتصفيها زى البطاطس المحمرة وتحطها فى الطبق

ومش عايزة اقولكم الطعم شكله ازاى




المشكلة مش كده


المشكلة ان التليفون رن

وانا رديت

وطلعوا ماما وبابا

آل ايه جايين بكرة الصبح


يالهووووووووووووى

هعمل ايه فى البلوة دى

هاخد تهزيء

طب بعدين ؟؟

قولت لنفسى ولا قبلين

يابت يا سارورة

كلى المكرونة كلها

وكااااان بها
.
.
.
اكلت

واكلت

واكلت

واكلت

وفجأة حسيت انى مش طايقة بطنى


((( ويييييييييييي واااااااااااااا وييييييييييييييي وااااااااااااااااا )))



سارورة : آآآه انا فييين ؟؟

واحدة كده ماعرفهاش : فى المستشفى

سارورة : ايييييييه ؟؟ يالهوووووووى مستشفى ليه ؟؟

اكيد بقى طلعت الممرضة : فى ناس جابوكى امبارح .. كان عندك تلبك معوى


سارورة يغمن عليها وتضلم الشاشة

[ The End ]

سارورة هوم ألون 3

| | 9 comments
أولاً بعتذر بجد عن التأخير

ودي بقى تالت حلقات سارورة هوم ألون

لو نسيتوا اللي فات .. ودا أكيد ههههههههههه ارجعوا للبوستات اللي فاتت

********


تانى يوم هوم الون وانا لسة عندى أمل انى هعييييش احلى اسبوع فى حياتى

بردو النت قاطع :'( ولسة السى دى روم راكبة دماغها

ومافيش قدامى الا التليفزيوووووووون

اوووووووووف .. قعدت اقلب اقلب وبعدين وانا بقلب شفت برنامج بتاع طبخ

روحت محولة وقولت الحمد لله عندى اكل النهاردة

ولا الحوجة

وحولت وقعدت اتفرج ومش فى دماغى

وبعدين جوعت فقولت اروح اكل بقى

روحت المطبخ وحطيت الاكل على النار وروحت كملت فرجة

وبعدين از فجاة شميت ريحة غريبة

قولت اكيد من الشارع

انا اقفل الشباك

قفلت الشباك وقعدت خمس دقايق الريحة بقت افظع

قولت لألألأ انا غبية ازاى ماقفلتش البلكونات

روحت قفلت البلكونات ورجعت اتفرج تااااانى

والريحة زادت وطلع معاها ريحة شيااااااااااااااط

حين اذ _ جامدة حتة الفصحى دى _ اكتشفت ان الاكل على النار

واكتشفت انه اتحرق

بس ما زعلتش

لأنى اكتشفت كمان انه كان حمض :'( وساعتها بس

لمحت ورقة التعليمات اللى رميتها

وشوفت انهم قالوالى ادخل الاكل فى التلاجة

عاااااااااااااااااااااااااا

بعدين الوقت اتأخر هجيب اكل منين دلوقتى

قلبت فى التلاجة طلعت شوية مكونات غريبة

اوطة و جبنة و فلفل اخضر و كوسة وحاجات غريبة كده

اوووووبا طب هما كانوا بيحلموا مثلاً انى هعرف اعمل الاكل دا ؟؟!!

المهم دعبست دعبست طلعت مكونات حسيت انها تنفع تعمل مكرونة

كده مشكلتى اتحلت فاضل حاجة صغنونة خالص

انى اعرف هى بتتعمل ازاى ؟؟

قولت بسييييييييييطة انا اقعد قدام القناة بتاعة الستات دى واستناهم يجيبوا مكرونة بتتعمل ازاااى

وطبعا الحل العبقرى دا خلانى قاعدة 24 ساعة قدام الهباب ان يجيبوا طريقة المكرونة ابتااااااااااااااااا

وانتهى بيا الامر لأنى اكلت جبنة وكنت هرجع خلاااااااص لأنى مش بحبها

ولسة عندى امل انى اعرف المكرونة بتتعمل ازاى

جابوها بعد 32 ساعة بالظبط

وحيث انى ماكنتش نمت فانا نمت فى نص الوصفة

بس مييييييييييين سارورة ماتعرفش المستحيل

قولت اذا كان الفيلم الاجنبى لما بيفوتنى حتة منى بستنتجها
المكرونة مش هستنتجها

واستنتجت

تفتكروا كانت ايه النتيجة ؟؟

اسيبكم تخمنواااا

سارورة هوم الون اتنين

| | 1 comments
النور جه

لسة هازغرررررررررررررط

راح قطع تااااااااااااااااااااااااني


ايه لعب العيال دا بقى ؟؟؟؟

وفجأة الجرس رن تانى

بس المرة دى جرس الباااااااااااااااااب مش جرس التليفوووووووون

نعم !!

النور قاطع وجرس الباب بيرن ؟!!!

وطنشت وهو يرن

انا اطنش وهو يرررررررررررن

يررررررررررررررررررررن

يرررررررررررررررن

فجاة جرس التليفون بطل يرن

لكن جرس الباب لسة بيرن وانا متخيلة ان النور قاطع

بعدين اكتشفت ان فيشة التليفزيون مهزوزة علشان كده ما ولعش

وطبعاً بما انى بحب اتفرج على التليفزيون فى الضلمة ما عرفتش ان النور جه

ولعت النور بتاع البيت كله وطلعت البلكونة بصيت من غير ما ابان كده مين بيرن الجرس لقيتهم الجيران

اتاااااااااارى بابا وماما هما اللى كانوا بيتصلوا وقلقوا عليا لما لقونى مش برد

بعتوا الجيران يطمنوا

طنط جارتنا : ايه يا سارورة سامعة التليفون ومش بتردى ليه ؟؟ قلتيهم وقلتينا عليكى ..

سارورة : ( اقولها ايه دى والنبى .. اقولها كنت خايفة علشان اضحك الشارع كله عليا وهى ست فضيحة اصلا ... يالهووووى ايه اللى عملته فى نفسى دا ؟؟!! )

- ابتسامة صفرا - احم .. معلش يا طنط كنت نايمة D:

  طنط جارتنا الفضيحة : ناااااااايمة ؟!!! دلوقتى ؟؟!! غريييييييييبة انا اعرف انك بتسهرى

سارورة : ( وانـ ـ ـ ـ تـ ـ ى مـ ـ ـ ـالـ ـ ـك انتى .. ايه دا !! اما ست رخمة بصحيح )

- ابتسامة صفرا - احم .. اه ما انا فعلاً بسهر بس النهاردة انا تعبانة .. كنت فى امتحان وكده بقى حضرتك عارفة D:

طنط جارتنا الفضيحة الرخمة : ( بتلوى بؤها ) امممممممممم ماعلينا .. المهم انا قولت اطمن عليكى واطمنهم .. هم هيتصلوا بيا كمان شوية تيجى تردى عليهم من عندى ؟

سارورة :( ماهو دا اللى ناقص كمان ، عايزة تشوفنى وانا بتهزأ )

- ابتسامة صفرا - لألألأ مش عايزة ازعجك .. قوليلهم بس يتصلوا بيا انا هحاول ما انامش D:

طيب سلام

سلام

وطلعت على السلم جرررررررررررررررررى لأنى بترعب من الشقة اللى تحت ..

طلعت فوق وقفلت عليا واخدت نفسى اخيراااااااا ياااااااااااه قلبى كان هيقف

يااااااااادوبك اخدت نفسى التليفون رن رنته المرعبة

دلوقتى انا لازم ارد

روحت رديت واتهزات واخدت اللى فيه النصيب وقفلوا الحمد لله

بعدين حسيت انى جوعت اوووووووى

ان انننننن

دخلت التلاجة جرى ادور على اكل والحمد لله لقيت اكل يكفينى النهاردة

وانا باكل افتكرت انى بطيخ فى المطبخ يالهووووووى بكرة هعمل ايه ؟؟ وبعده هعمل ايه ؟!!

فجاتلى فوكيرة

قلت مش لازم اشبع النهاردة علشان الاكل يكفينى وكاااااااان بها

سيبونى أكل بقى وبكرة اكمل الحكاية  

سارورة هوم ألون

| | 3 comments
رجعت من الامتحان لقيت البواب بتاع العمارة

اللى جنبنا مستنينى على اول الشارع

ومدينى مفتاح البيت

استغربت

امال فين اهل الببببببببببببت ؟؟؟؟؟؟

لقيته بيقولى هما سافروا وبيقولولك المفتاح اهو ولما تخرجى

تسيبيه معايا عشان انتى بتضيعى المفاتيح

(((( حسيت كلمة مسطولة على لسانه بس الراجل محترمنى بردو ))

طلعت فوق لقيت ورقة التعليماااااااااااااااااااااااات
(( سارورة تيته تعبانة ولازم نكون معاها وانتى عندك امتحانات
ماحدش هايقدر يجيلك الا بعد اسبوعين

هتلاقى اكل فى التلاجة يكفيكى اسبوع
وهانتصل بيكى نقولك تعملى ايه الاسبوع التانى
واوعى تخرجى بالمفتاح
اوعى حد يعرف انك لوحدك
اوعى تسيبى البلكونة مفتوحة زى عادتك .....إلخ ))

طبعا بغض النظر عن ان تيتة تعبانة
ماصدقتش نفسى
وااااااااااااااااااااااااااااااااااااااااااااااااو
اسبوووووووووووعين بحالهم هوم الون
واااااااااااااااااااااااااااااااااااو
اسبوعين نت وكمبيوتر ودش
لوووووووووووووووووووووووووووووووووحدى
ماكملتش التعليمات اللى فى الورقة
عادى بقى اعيش واصرف نفسى
وهجووووووووووووووووووووووووووووم على الكمبيوووووووووووووووووووووتر
نت نت نت حتى الموت
وفتحت الجهاااااااااااااااااااااااااز
ورسمت فى دماغى جدول اعمالى
كاظم وبعده عمرو وبعده ماجد وبعده اليسا
وهاااااااااااااااااااعيش
وفجأة اتصدمت الصدمة المريعة

ماااااااااااافيش نت

اوووووووووووووووووووووووووووووووبا

دلوقتى يجي يا سارورة ماتخافيش

هايجي ياماما

قضيها سيديهات يا حبيبتى

حاااااااااااااااااااااااضر هنقضيها سيديهات

وبعد بحث مضنى عن السى دى اليتيم لكاظم

السى دى رووووووووم بااااااااااااااااااايظة

انهرت والليل بدأ يدخل

وانا بصراحة اكتشفت انى



.
.
.
.
.
.

بخاااااااااااااااااااااااااااااااف

مش مهم قضيها تليفزيون ..

قولت هاعمل ايه ؟؟

هاقضيها تليفزيون مدام النت استندل

انا طبعا بعشق قناة الاكشن

وطبعا بموووووووووووت فى افلام الرعب

بس فاتنى انى مش وانا لوحدى فى البيت كله

وال ايه كماااااااااااان

اتفرج على

THE RING


وطبعا كلنا عارفين الفيلم

وانا كمان عارفة ومتفرجة عليه مية مرة

بس حبكت معايا

اتفرجى بقى يافالحة

فجأة اول ما الشريط خلص عندهم فى الفيلم

وقبل ما تليفزيونهم ياقول وشششششششششش

هوووووووووووووووب الدنيا ضلمت

يانهار ابيض

النور قطع

النور قطع وانا لوحدى فى البيت

انا ماخفتش طبعا

ولا اتهزت شعرة فيا


انا كلى اترعبت وبقيت برتعش

اهدى ياسارورة ..

دلوقتى يجي ياحبيبتى ..

اهدى ياماما .... "



واز فجأة


التليفون يررررررررررررن


لأ

لو نطقت قدامى مش هارد

هنهرج


ال ارد ال

انا هبلة عشان ارد

انا لسة شايفة الفيلم حالا

" اهدى ياسارورة دلوقتى يبطل رن "

ويرررررررررررن

يرررررررررررررن


يرررررررررررررررن

مش راضى ينكتم خالص

يالهووووووووووووووووووووووى

وبعدين

اصلا صوت التليفون بيجيب رعب لوحده

واخييييييييييييييييييرا

التليفون بطل رن

ويادوبك دقيقتين

والنور جه


لسة هازغرررررررررررررط


راح قطع تاااااااااااااااااااااااااانى

اوووووووووووووبا



ايه لعب العيال دا بقى ؟؟؟؟

وفجأة الجرس رن تانى


بس المرة دى جرس الباااااااااااااااااب مش جرس التليفوووووووون



نعم !!

النور قاطع وجرس الباب بيرن ؟!!!

وطنشت وهو يرن


انا اطنش وهو يرررررررررررن


يررررررررررررررررررررن


يرررررررررررررررن

___________________________
قلبي هيقف احكي لكم وقت تاني بقى