"بصيت للقطة في عينها
القطط عارفين حاجات
احنا مش عارفينها"
وليد طاهر/ حبة هوا
__________________________
اختفاء كاميلا/ اختفاء سيمبا/ اختفاء القط المتوحد/ الحلم !
وانا طفلة كنت بعشق ضلمة سطوحنا.. بخاف من ضلمة الشقة.. لكن ضلمة سطوحنا لأ
يمكن لأن القطط كانت دايمًا تطلع معايا :)
في عز الضلمة.. في مكان معين على السلم، وأنا بقى خلاص بحاول أقنعهم إني لازم ادخل الشقة
وهم مش هينفع يدخلوا..
كل القطط كانت تبص لفوق على السلم.. ورا ضهري، وتقعد تنونو وتنفعل زي بالظبط ما بتعمل لما قطة من برة تيجي تضربها!
أحاول اكلمها، ألاعبها، مافيش فايدة.. مركزة جدًا ومبرقة عنيها، وملامحها بتقول إنها خايفة
اختلفت القطط على مدار السنين، وبردو مافيش فايدة.. كل القطط بتترعب من الجزء دا من السلم
الغريب بقى .. إنه لما كاميلا اختفت ( كاميلا كانت قطة ملائكية الهيئة :) بيضا وهادية وبتحب مسلسل كاميلا اللي كان بيتعرض وقتها وكانت متابعاه :) .. أكتر قططي أنوثة ورقة ) جات لي في الحلم.. وهي زعلانة.. وقاعدة في المكان دا من السلم، ووصتني على ولادها !
قبل كاميلا.. بيشو ليلة ما اتقتل، جالي في الحلم بيبص لي وساكت وزعلان.. في نفس المكان!
أولاد كاميلا كلهم بعد فترة اختفوا !!
حتى القط المتوحد الأسود (خال اولاد كميلة من جيل تاني ) اللي اتبنى أولاد كاميلا لما اختفت... حتى هو اختفى !
نسمة (أكتر قطة عاشت معايا ) لما اختفت جاتلي في الحلم في نفس المكان، زعلانة وبتبص لي نفس النظرة!
دلوقتي أنتكة.. عنده حالة عصبية تقريبًا.. كل ما نكون قاعدين نلاقيه فجأة اتخض.. وقعد يركز في الضلمة وينونو.. لدرجة إنه بقى يرعبنا..
وبدأت أحس إنه هفأ مش لأني ما عرفتش أربيه.. لكن لأنه بيشوف حاجات مرعبة في الضلمة :( لوحده
أنتكة في مرة جاتله الحالة، فتحت الباب أبص عليه.. على غير عادته أول ما الباب يتفتح.. ما حسش بيا أصلاً !
مركز في نقطة ما في سقف السلم.. في نفس المكان.. بنفس زاوية الرؤية بتاعة كل القطط..
ومبرق جدًا بعينه.. وبيحرك بقه كأنه بيبرطم.. وكان بيبرطم فعلاً بالقططي :D
منظره رعبني لدرجة إني ندهت لأختي وماما، كل دا والباب مفتوح وهو ما جريش يدخل كالعادة..
ولما حاولنا نروح نبص على مكان ما هو بيبص، ما لقيناش حاجة بس هو بدأ صوته يعلى، وقعد يطلع قدامنا كأنه بيحوش عننا :(
مارضيش يدخل جوا الشقة إلا لما رجعنا لورا.. طلع تاني بعد ما دخل يبص في نفس المكان ويبرطم بالقططي
وما هديش إلا لما قفلنا الباب..
ولسة لحد دلوقتي.. أنتكة أول ما يطلع من الشقة، ويلاقي نفسه لوحده في مواجهة السلم.. يطلع يجري :(
الأول كنت بحسبه بيتقمص.. بس اكتشفت دلوقتي إنه بيكون خايف !
ملحوظة: لما عمل كده قرأت قرآن بصوت عالي ما حصلش حاجة !! لا صوته علي ولا قل، ولا خوفه زاد ولا قل
ملحوظة تانية: هذا البوست قد يكون فاكس :D
كوكتيل من حاجات حصلت، وحاجات أنا اتخيلتها :)
أو نقول.. حاجات حصلت.. وكانت الصورة مش كاملة.. فانا اتخيلت باقي الحكاية :)
