سارورة هوم ألون الأخيرة

| |


زى ما انتوا عارفين

الجوع كافر .. والشيطان شاطر .. والنوم سلطان

الـ 3 بشوات اجتمعوا عليا

كنت همووووووت من الجوع ولازم اكل

والشيطان لعب فى دماغى وقالى اعملى اكل

والنوم حلف ما يسيبنى

انا شفت اول البرنامج بعد معاااناة عقبال ما جابوا مكرونة

عملت الصلصة وسلقت المكرونة

وهووووووووووووب

صحيت من النوم لقيت المكرونة فى الطبق


يالهوى

خيااااااااااااااااااااانة

ازاى تسمح لنفسها تعمل كده فيا

وبكل بلاهة بتبتسم وتقول سفرة هنية

يالهووووووى هعمل ايه دلوقتى بس ياربى ؟؟

زى ما انتوا عارفين دايما شعارى

مافيش فايدة فيا مافيش مستحيل

هع

انا هستنتج باقى الوصفة

ايه يعنى صعبة فى ايه ؟!!

هى اخترعت الذرة مثلاً دى مكرونة

وروحت جرى على المطبخ

عملت الصلصة زى ما الست قالت فى التليفزيون

وسلقت المكرونة

ودلوقتى بقى كانت اللحظة الحاسمة


احم ..

احم ..

هعمل ايه بعد كده ؟؟؟؟؟!!

بعدين عملت فلاش باك

ورجعت بالذاكرة للمكرونة بتاعة ست الكل امى

افتكرت ان المكرونة بيبقى لونها احمر

يعنى الصلصة محطوطة ع المكرونة

عملت فيها ارشميدس وقلت

وجدتهاااااااااا وجدتهاااااااا

وطبعاً لأنى شطورة

وحلوة

ومافيش مني اتنين

قولت اكيييييييييييد مش هفرط فى الماية اللى اتسلقت فيها المكرونة

ايوة ماما دايما تقولى الشوربة فيها كل الفايدة

والشوربة دى تبقى ايه غير الماية اللى اتسلقت فيها االلحمة

طيب والمكرونة تفرق ايه عن اللحمة ؟؟!!

ولا حاجة ..


روحت صبيت المكرونة بمايتها على الصلصة

وبعدين حسيت ان فى فروق طفيفة

يعنى انا فاكرة لما عملت فلاش باك وافتكرت مكرونة ماما

انها كانت مش عايمة فى شوربة

قولت اكيد بيسيبوها لما تشرب الماية


واستنيييييييييت


سااااعة


اتنييييييييييييين

وبعدين اخيرا اخيرا الماية قلت شوية

قولت بس اكيد ماما كانت بتصفيها زى البطاطس المحمرة وتحطها فى الطبق

ومش عايزة اقولكم الطعم شكله ازاى




المشكلة مش كده


المشكلة ان التليفون رن

وانا رديت

وطلعوا ماما وبابا

آل ايه جايين بكرة الصبح


يالهووووووووووووى

هعمل ايه فى البلوة دى

هاخد تهزيء

طب بعدين ؟؟

قولت لنفسى ولا قبلين

يابت يا سارورة

كلى المكرونة كلها

وكااااان بها
.
.
.
اكلت

واكلت

واكلت

واكلت

وفجأة حسيت انى مش طايقة بطنى


((( ويييييييييييي واااااااااااااا وييييييييييييييي وااااااااااااااااا )))



سارورة : آآآه انا فييين ؟؟

واحدة كده ماعرفهاش : فى المستشفى

سارورة : ايييييييه ؟؟ يالهوووووووى مستشفى ليه ؟؟

اكيد بقى طلعت الممرضة : فى ناس جابوكى امبارح .. كان عندك تلبك معوى


سارورة يغمن عليها وتضلم الشاشة

[ The End ]

6 comments:

فكرة من الزمن ده said...

كل ده علشان مكرونة
يابنتي انزلي اشتريها جاهزة وريحي دوماغك
او اعملي دليفري اي حاجة
ههه
تحياتي

Samar Aboubakr said...

ههههههههههههههههههههه
ياااااااااااااااااه انا بقالى زمن بدور على the end
من ايام ما كنت مسافرة مكنتش عارفه ايه اللى حصل

الف لا باس عليكى يا سرسورة
:p

الغاردينيا said...

لااااااااااا بكذا هصدق ان في عفاريت بالمدونه دي ههههههه
انا وضعت تعليق من ساعاااااات
ولسه مطلعش هو في عفاريت عندكو بجد ولا ايه ^_^

ربنا يشفيك من مكرونتك هههه
ومدونة جميلة بجد وحبيتها وخصوص صورة الساحر والمكنسه تبعه هههه لذا اضفتك عندي عشان اتابعك دايما

محبة وتقديررر

دودي فلسطين said...

هاااي
اول مره بدخل مدونتك
وهي مدونه شريره ولزيزه
وفكرتها كتير حلوه

كنت بفكر حالي ما بعرف اطبخ
بس بالمعكرونه طلعت ست بيت

تحياتي

Kiara said...

هههههههههههههههههههههههه

وربنا عثل

رحاب صالح said...

صباح الورد
ههههههههههه
بجد ضحكت من قلبي انا اصلا دخلت المدونة علي اساس قصص رعب
بس بجد تحفة