بيت الرعب يا بيتنا

| |
بيتنا مرعب أوي .. مش أن لوحدي اللي بقول كده


دا البت دعاء صاحبتي قالتلي كده هي كمان من كام يوم


ومش بيتنا بس .. دا الشارع كله فيه حاجة غريبة كده


علشان تبقوا في الصورة .. هوصف لكم شارعنا وبعديه هوصف بيتنا


شارعنا أولاً وااااااااااسع أوي


قصادنا في جزيرة بتطلع على فرع من ترعة كبيرة ..


الجزيرة دي متحاوظة بالغاب ..


الشارع طووووويل أوي وساااااااااااااااااكت جداً رغم انه مليااان سكان


بس كلنا ساكتين كده وفي حالنا ماحدش بيمشي في الشارع الا نادراً كده


الصف اليمين كله من الشارع كل البيوت اللي فيه زارعة قدام البيت شجر


والصف الشمال (( اللي فيه بيتنا )) كله ماحدش زارع شجر


وكل البيوت اللي في الشارع عالية أقصر بيت 3 أدوار


وكلها ساكن فيها دور ولا اتنين والباقي فاضي وضلمة كده


وفي آخر الشارع بعييييييييييييييد أوي في فرع فقير من ترعة كده
نيجي بقى لبيتنا .. بيتنا تاني بيت في الشارع من قدام
عبارة عن خمس ادوار واحنا مش قاعدين غير في دور واحد بس
اللي هو التاني .. يعني تحتنا فاضي وفوقينا فاضي
فتخيلوا بقى قد ايه البيت فاضي ومرعب
لأ وكمان ايه .. الشقق اللي فوقينا كلها متركب فيها ابواب وشبابيك خشب
فأيام الشتا بقى تخيلوا الصوت الرائع اللي بيطلع من رزع البييبان والشبابيك من الهوا
البييت بقى من جوا لما تدخل من باب الشقة هتلاقي السفرة .. بعديها الصالون .. الصالون دا بقى اكتر حتة مرعبة في بيتنا هو واوضة ماما وبابا اللي جنبيه
وانا سهرانة أذاكر باليل اجي اقوم ادخل المطبخ ولا حاجة اتخيل ان كراسي الصالون دي حد واقف وبيبص لي ..
أو في تحتيها حد قاعد وهينط يموتنى
ماعرفش ليه .. بس مش برتاح أبداً الا لما اولع نور الشقة كله واروح على باب الصالون أقفله
المشكلة انه كتيييييييييير أوي بيتفتح لوحده واحنا الكوالين عندنا صعبة مش سهلة تتفتح كده
جنب الصالون أوضة بابا وماما .. بصراحة ما بعرفش انام فيها الا لما اكون عيانة .. مرررررررررررعبة
ليه بقى ؟ الأوضة طويلة بشكل مبالغ فيه
فلما بتكون في أولها بتبقى مرعوب من آخرها
وفي النص فيها نجفة من اللي هي شكلها طبق دي
وعلى طروفها خمس أطفال من بتوع كيوبيد اللي ماسك سهم دي
طبعاً بالليل النور اللي بيدخل من الشباك بيعمل شغله في انه يخليني أتخيل كل حاجة مرعبة ممكن حد يتخيلها في النجفة دي
و كمان دايماً عندي هاجس ان في شبح هيطلع لي من تحت السرير ..
جنب أوضة ماما أوضة أخويا .. ودي أقل الاوض رعباً .. يمكن لأن فيها بلكونة ع الشارع .. بس بردو بخاف انام فيها لأن فيها باب المنور
وطبعاً المنور دا في حد ذاته سلسلة من أفلام الرعب بالنسبة لي
قصاد أوضة أخويا .. أوضتي .. دنيتي حبيبتي
أوضتي دي رغم أنى بترعب فيها رعب الدنيا والآخرة بس بحبها ومش بعرف أنام غير فيها
ودي هحكيلكم عنها حكاااااااااااااوي بعدين
جنب اوضتى المطبخ وجنبه الحمام وطبعاً في في النص صالة
كده اعتقد تخيلتم شكل بيتنا
استنوا بقى البوست الجاي وحكاية من حكاوي بيت الرعب .. اللي هو بيتنا

7 comments:

الخوجة said...

دا بيتكوا روعة دانتى ساكنة فى منطقه شاعرية وهادية
انا لاأحب واتقن المشى فى الظلمة وياسلام لما حد يقابلنى فى الظلمة واطرقع له
ولا النوم فى الظلمة من المغرب قمة الشاعرية والهدوء
رائعه

Misrdream said...

هههههههههههههههههههه
بجد اسم مدونتك شديد
بس يظهر انك خوافه زياده عن اللزوم
فى حد يخاف من بيتهم عموما انا مستني اشوف باقي قصصك علشان نتاكد فعلا هل البيت مرعب ولا انتى بتخافي
تحياتي

سمو الأميرة سارة said...

الخوجة .. رومااااااااااانسي ؟!! حرام عليك
تاخده واديك عليه مروحة ههههههههه
لأ بجد دا انا كتير بعيط من كتر هدوء شارعنا وبيتنا
نووووووووورتني يا خوجة

سمو الأميرة سارة said...

حلم مصر .. هههههههه انا مش خوافة أبداً خالص مالص .. انا جباااااااااانة بس هههههههه
ولما احكي على بيتنا هتعرف اني معايا حق

Alaa El-Shaikh said...

هههههههههههههههه حرام عليكي يا سارة .. والله كنت هقوم أتصل بيكي .. أطمن عليكي ... هههههههههههههههههههههه .. بس ماشاء الله عليكي .. أسلوبك كالعادة مش محتاج كوممنت .. ربنا يباركلك في موهبتك ويبعد عنك اللي يخوفك ..

مواطن مصري said...

ههههههههههههههههه اغلب قصص فرانكشتين دي بتموت من الضحك خصوصا الفلم اول ما شفتة لاقيتة عبيط عام زي افلام اللمبي

مامة مازن said...

يا نهارك ابيض دا انتى اللى بتخوفى نفسك
على العموم انتى قصصية هايلة